კორნელი კეკელიძის სახელობის საქართველოს ხელნაწერთა ეროვნული ცენტრი ახორციელებს ინსტიტუციურ პროექტს - მე-7 საერთაშორისო საზაფხულო სკოლა „ქართული ხელნაწერი“, რომელიც დაფინანსებულია შოთა რუსთაველის ეროვნული სამეცნიერო ფონდის მიერ საზაფხულო სკოლა ხორციელდება ლუვენის კათოლიკური უნივერსიტეტის (ბელგია) თანამონაწილეობით. სკოლის განხორცილების პერიოდია: 17 - 26 ივლისი, 2024წ.

მე-7  საერთაშორისო საზაფხულო სკოლაში მონაწილეობის მიღების მიზნით შემოვიდა 70-მდე სააპლიკაციო განაცხადი მსოფლიოს 14 ქვეყნიდან. სკოლის სამეცნიერო კომიტეტის მიერ შემუშავდა გარკვეული შერჩევის კრიტერიუმები: კანდიდატის სამეცნიერო პროფილი, სკოლაში მონაწილეობის მოტივაცია, კანდიდატის პრეზენტაციის თემის აქტუალობა, რელევანტურობა, სიახლე, კონტექსტი; სკოლის დასრულების შემდეგ კონტაქტების გაგრძელების პერსპექტივა. შედეგად შეირჩა 12 მონაწილე, რომლებიც შემდეგ ქვეყნებს წარმოადგენენ: აზერბაიჯანი, გერმანია,  თურქეთი, იორდანია, იტალია, საფრანგეთი, საქართველო,  სომხეთი, უკრაინა, შვეიცარია, ტაჯიკეთი. შერჩევისას უპირატესობა მიენიჭათ ჰუმანიტარული მიმართულებით მომუშავე კანდიდატებს, რომელთა სამეცნიერო ინტერესები შეესაბამება ხელნაწერთა ეროვნული ცენტრის ძირითად სამეცნიერო-კვლევით მიმართულებებს.

სკოლის სამუშაო პროგრამა საკმაოდ დატვირთული იყო, ითვალისწინებდა 30 ლექციის, სამი ვორქშოფის, ინეტრაქტიული პროგრამების და გასვლითი ღონისძიებების განხორციელებას ხუთი სასწავლო მოდულის მიხედვით: 1. საქართველო: ისტორია, ენა, დამწერლობა, 2. ქართული ხელნაწერი - ჟანრობრივი და თემატური მრავალფეროვნება; 3. ქართული ისტორიული დოკუმენტი, 4. ქართული ნაბეჭდი წიგნი და 5. ხელნაწერთა ეროვნული ცენტრი, როგორც ფორუმის მასპინძელი უნიკალური ინსტიტუცია - ხელნაწერების უმნიშვნელოვანესი საცავი და სამეცნიერო-კვლევითი ცენტრი.