კორნელი კეკელიძის სახელობის საქართველოს ხელნაწერთა ეროვნულ ცენტრში გრძელდება გამოუქვეყნებელი საარქივო მასალის პუბლიკაცია. სერიის – „საარქივო მასალები“ – მეორე წიგნად ქვეყნდება მიხეილ თარხნიშვილისა და იულიუს ასფალგის მიმოწერა. უცხოეთში მოღვაწე ქართველმა მეცნიერმა მიხეილ თარხნიშვილმა და გერმანელმა ქართველოლოგმა იულიუს ასფალგმა ძველი ქართული მწერლობის კვლევისა და პოპულარიზაციის საქმეში მნიშვნელოვანი წვლილი შეიტანეს. მათ წერილებში, რომელთა უმეტესობა 1951-1958 წლებით თარიღდება, კარგად ჩანს ამ ორი მეცნიერის მოღვაწეობის და თანამშრომლობის დეტალები.